தண்ணீர் ரகசியம் எதைக் குடிப்பது.. எதைத் தவிர்ப்பது?

மூச்சிரைக்க விளையாடிவிட்டு, வரும் வழியில் கிணற்றிலோ, தெருக்குழாயிலோ தண்ணீர் குடித்த காலம் இன்று இல்லை. இன்று நாம் குடிக்கும் தண்ணீரில் இருந்து உண்ணும் உணவு வரை அனைத்துமே ரசாயனக் கலப்பாகிவிட்டது.

வீட்டில் காய்ச்சி ஆறிய தண்ணீரைக் குடித்துவிட்டு வேறு இடங்களுக்கோ, விசேஷங்களுக்கோ செல்லும்போது அங்குள்ள தண்ணீரைக் குடித்தால், அடுத்த நாளே சளிபிடித்துவிடுகிறது.

மினரல் வாட்டர் என்று பாட்டில்களில், கேன்களில் கிடைக்கும் தண்ணீரைக்  குடித்துப் பழகிவிட்டோம். உண்மையில் அதில் ஊட்டச் சத்துக்கள் உள்ளனவா, சுத்தப்படுத்துகிறோம் என்ற பெயரில் தண்ணீரில் உள்ள சத்துக்கள் நீக்கப்பட்டு வெறும் சக்கையான நீரைத்தான் பருகுகிறோமா என்று பல்வேறு சந்தேகங்கள் எழுகின்றன. நீரின் தன்மை பற்றி  சென்னையைச் சேர்ந்த பொது மருத்துவர் எழிலனிடம் கேட்டோம்.

'நம் உடலில் 50 முதல் 60 சதவிகிதம் வரை நீர்தான். ஒரு மனிதனுக்கு சராசரியாகத் தேவைப்படும் தண்ணீரின் அளவு என்பது அவனுடைய உடல், வாழும் இடத்தின் சுற்றுச்சூழல், வேலை ஆகியவற்றைப் பொறுத்து வேறுபடும். ஒருவருடைய உடல் எடையை வைத்து, அவருக்குத் தேவைப்படும் தண்ணீரின் அளவைக் கணக்கிடலாம்.    அந்தக் காலத்தில் இயற்கையிலேயே மூலிகைகள் கலந்த, சூரிய ஒளிபட்ட, கிருமிகளை மீன் தின்று சுத்தம் செய்த நீரைத்தான் குடித்து வந்தோம். அப்படிப்பட்ட சுத்தமான தண்ணீர், இன்று மனிதர்

களால் மாசுபட்டுள்ளது.  நம் நாட்டில், சுத்தமான குடிநீர் என்பது வெறும் 33 சதவிகிதம் மட்டுமே. இதனால்தான் கிருமியால் ஏற்படும் இறப்பு விகிதம் அதிகரித்திருக்கிறது'' என்றார் டாக்டர் எழிலன்.

நாம் பருகும் நீர் எப்படி சுத்திகரிக்கப்படுகிறது என்பது பற்றி அக்வா டெக் சிஸ்டம் நிறுவனத்தின் நிர்வாக இயக்குனர் மூர்த்தியிடம் கேட்டோம்... 'வீட்டில் பொருத்தப்படும் வாட்டர் பியூரிஃபையரிலும், தண்ணீர் கேன் நிரப்பும் தொழிற் கூடங்களிலும் கிட்டத்தட்ட ஒரே மாதிரியான தொழில்நுட்பம்தான் பயன்படுத்தப்படுகிறது.  முதலில் கேண்டில் பில்டர் என்று சொல்லப்படும் தொழில்நுட்ப முறையில், இயற்கை மாசு வெளியேற்றப்பட்டு தண்ணீர் சுத்திகரிக்கப்படுகிறது. 

எதிர்சவ்வூடு பரவல் தொழில் நுட்பத்தின்படி மைக்ரான் அளவிலான சவ்வு வழியாக சுத்திகரிக்கப்பட்ட நீர் செலுத்தப்படுகிறது. அதையடுத்து கார்பன் ஃபில்டர் செய்யப்படுகிறது. பின்னர் ஒரு மைக்ரான் சவ்வு வழியாகவும், அதனையடுத்து 0.0001 மைக்ரான் அளவிலான சவ்வு வழியாகவும் அனுப்பப்பட்டு, தண்ணீரில் இருக்கும் மாசுக்கள் அகற்றப்படுகின்றன. இப்படிக் கிடைக்கும் தண்ணீர் மிகவும் சுத்தமானது.

வீட்டில் பயன்படுத்தும் சில சுத்திகரிப்பான்களிலும், தொழிற்கூடங்களிலும் அல்ட்ராவயலட் கதிர்களால் சுத்திகரிப்பு செய்யப்படுகிறது. இதன் மூலம் கிருமிகள் முற்றிலுமாக அழிக்கப்படுகின்றன. இந்த முறையில் இருந்து பெறப்படும் நீரின் பாதுகாப்பு மேலும் உறுதிப்படுத்தப்படுகிறது.

கேன் நிறுவனங்களில் தண்ணீர் சுத்திகரிக்கப்படும் முறை

இந்தியத் தர நிர்ணய விதிகளை, சில  நிறுவனங்கள் முறையாகக் கடைப்பிடிக்கின்றன. ஆனால், சில நிறுவனங்கள், தரமற்ற கேன்களை உபயோகப்படுத்துவதும் நடக்கிறது. சுத்திகரித்த தண்ணீர் சுகாதாரமற்ற கேன்களில் சேரும்போது, மீண்டும் தண்ணீரின் தரம் கெட்டுவிடுகிறது.

மினரல் வாட்டர் என்றால் என்ன?

காசு கொடுத்து வாங்கும் பாட்டில்களில் உள்ள தண்ணீர்தான் மினரல் வாட்டர் என்று நினைக்கிறோம். ஆனால், அது உண்மை  இல்லை. நாம் வாங்கும் பாட்டில்களில் இருக்கும் தண்ணீர்  'சுத்திகரிக்கப்பட்டுப் பாதுகாக்கப்பட்ட குடிநீர்' (packaged Drinking water) அவ்வளவு தான்.  மினரல் வாட்டர் என்பது கனிமங்கள் சரியான அளவில் கலக்கப்பட்ட சத்தான குடிநீர். ஒரு லிட்டர் தண்ணீரைத் தயாரிக்கவே 100 ரூபாய்க்கும் அதிகமாக செலவாகும்' என்றார்.

'தண்ணீரைச் சுத்தம் செய்ய, பல நவீன வசதிகள் வந்து விட்டாலும், அந்தக் காலத்தில் நம் முன்னோர்கள் தண்ணீரைத் தூய்மைப்படுத்தப் பயன்படுத்திய முறைகள், அவற்றுக்கு எந்த விதத்திலும் குறைந்தவை அல்ல' என்கிறார்  சித்த மருத்துவர் திருநாராயணன்.

மேலும் அவர் கூறுகையில் 'தண்ணீரின் கடினத்தன்மையை மாற்றுவதற்கு, அந்தக் காலத்தில் நெல்லிமரக் கட்டையையும் தேற்றாங் கொட்டையையும் (தேத்தா விதை) பயன்படுத்தினார்கள். அதில் இருக்கும் பாலிபீனால் என்னும் பொருள், தண்ணீரில் இருக்கும் தாதுக்களை மென்மையாக்குவதால், நீரின் கடினத்தன்மை குறைந்துவிடுகிறது.

முன்பெல்லாம் வீட்டுக் கொல்லையில் இருக்கும் கிணற்றில், நெல்லிமரக் கட்டையைப் போட்டுவைப்பது வழக்கம். அல்லது, தேற்றாங் கொட்டைகளைப் பொடித்து, ஒரு துணியில் கட்டி இறக்கிவிடுவார்கள். 15 நாட்களுக்கு ஒரு முறை மாற்றுவார்கள். கிணற்றில் மட்டுமல்ல, பானையில் கூட தேத்தா விதைகளைப் பொடித்து, துணியில் கட்டிப் போட்டுவைக்கலாம்.இப்போதும் நம் வீடுகளில் வரும் நீர் கடின நீராக இருந்தால், சம்ப் மற்றும் மேல்நிலைத் தண்ணீர் தொட்டிகளில் நெல்லிக் கட்டை அல்லது தேத்தாங் கொட்டையைப் போட்டுவைக்கலாம். நல்ல பலன் கிடைக்கும்.  

நீரைக் குடிக்கும் முறை

மோர் பெருக்கி, நீர் சுருக்கி, நெய் உருக்கி உண்பவர்தம் பேர் சொல்லப்போகுமே பிணி' என்பது தேரையர் பாடல்.

நீர் சுருக்கி' என்பது நீரைக் காய்ச்சி (அதாவது வற்ற வைத்து) குடிக்க வேண்டும் என்பதைத்தான் குறிக்கிறது. எனவே, காய்ச்சிய தண்ணீரைக் குடிக்கும் பழக்கமும் பாரம்பரியமாக   இருந்துவந்ததுதான். அதிலும், செம்புப் பாத்திரத்தில் காய்ச்சிக் குடித்தால், உடலில் இருக்கும் நிறமிகள் மற்றும் சருமத்துக்கு மிகவும் நல்லது.

தண்ணீர் சில மருத்துவப் பலன்கள்

  மருதம்பட்டையை, வெதுவெதுப்பான தண்ணீரில் இரவு முழுவதும் ஊறவைத்திருந்து, காலையில் அருந்தினால், இதயம் பலப்படும். ரத்தம் உறையாமைப் பிரச்னையைத் தடுக்கும் நல்ல மருந்து இது.

  சுத்தமான சந்தனத்தை உரைத்து, அதை மிளகு அளவு எடுத்து, 60 மி.லி. தண்ணீரில் கரைத்துக் குடித்தால், சிறுநீர் கழிக்கும் போது ஏற்படும் எரிச்சல் தீரும்.

  பெருஞ்சீரகம் சிறிதளவு எடுத்து, கொதிக்கும் தண்ணீரில் போட்டு வைத்திருந்து, மறுநாள் முழுக்கக் குடிப்பதற்கு அந்த நீரையே பயன்படுத்தி வந்தால், போதைப் பொருட்கள் மேல் வெறுப்பை ஏற்படுத்தும். மேலும், செரிமானத்தையும் சீராக்கும்.

  ஓமம் ஊறவைத்த தண்ணீரை, குழந்தைகளுக்குக் கொடுத்தால், செரிமானக் கோளாறுகள் நீங்கும். வயிற்றுப்போக்கு இருந்தாலும் கட்டுப்படுத்தும். நம் வீடுகளில் முன்பெல்லாம் 'ஓமவாட்டர்' கண்டிப்பாக இருக்கும். பெரியவர்களுக்கும் குழந்தைகளுக்கும் வயிற்றுப் பிரச்னைகள் ஏற்பட்டால், நல்ல மருந்து அது.

  நாட்டுமருந்துக் கடையில் கிடைக்கும் சதகுப்பையை, கொதிக்கும் தண்ணீரில் ஊறவைத்து, மறுநாள் அருந்தினால் செரிமானத்தைச் சீராக்குவதுடன், வயிற்றை இழுத்துப் பிடித்து வலிப்பதற்கும் நல்ல மருந்தாகும். அந்தக் காலத்தில் குழந்தைகளுக்குக் கொடுக்கப்படும் 'கிரைப் வாட்டர்' போன்று செயல்படும்.

  கொதிக்கும் தண்ணீரில் புதினா இலையைப் போட்டு வைத்திருந்து, அந்தத் தண்ணீரில் வாய் கொப்பளித்தால், வாய் துர்நாற்றம் நீங்குவதுடன், கிருமிகள் வராமல் தடுக்கும். வீட்டிலேயே செய்துகொள்ளக் கூடிய மவுத்வாஷ் இது.

  வில்வ நீர், துளசி நீர் இரண்டுமே நோய் எதிர்ப்புச் சக்தியை அதிகப்படுத்த உதவும்.

காய்ச்சிய தண்ணீர்

தண்ணீரைக் காய்ச்சிக் குடியுங்கள்' என்கிறார்கள். தண்ணீரைக் கொதிக்க வைக்கும்போது, 99.9 சதவிகிதம் பாக்டீரியா, வைரஸ் போன்ற கிருமிகள் அழிகின்றன. ஆனால், பலருக்கு முறையான கொதிக்கவைத்தல்' பற்றிச் சரியான புரிதலோ வழிகாட்டுதலோ இல்லை. தண்ணீரை அடுப்பில் வைத்து, லேசாகச் சூடு வந்ததுமே அடுப்பை அணைத்துவிடுகின்றனர். நீரை நன்றாகக் கொதிக்கவைத்து, குமிழ்கள் வரும்போது, அந்தக் கொதிநிலையிலேயே 10 நிமிடங்கள்் இருக்கவேண்டும். இந்த நீரை ஆறவைத்து, வடிகட்டி அன்றே குடித்துவிட வேண்டும். முதல் நாள் காய்ச்சிய நீரை மறுநாள் பருகுவதால், எந்த நன்மையும் இல்லை. மேலும், பானையில் வைத்திருக்கும் நீராக இருந்து, ஒவ்வொரு முறையும் கையை விட்டு்த் தண்ணீரை எடுக்கும்போது, நம் கை மூலம் சில கிருமிகளை உள்ளேவிடுகிறோம். எனவே, தண்ணீரை முகந்து குடிக்காமல், ஊற்றிக் குடிப்பதுதான் நல்லது' என்கிறார்  டாக்டர் எழிலன்.

http://pettagum.blogspot.in/2014/10/blog-post_99.html


--

இது என் இறைவனின் அருட்கொடையிளிருந்து அருளப்பட்டது www.sahabudeen.com

இலவசமாக இணையத்தில் பெறலாம் வில்லங்கச் சான்றிதழ்!

இணையத்தின் மூலம் வில்லங்கச் சான்றிதழை இலவசமாகப் பெறும் வசதியை தமிழக அரசு அறிமுகம் செய்துள்ளது.

பொதுவாக வீடு, நிலம் போன்ற சொத்துகளை வாங்குவோர் அந்த சொத்து குறித்தும், முந்தைய உரிமையாளர்களின் விவரங்களை அறிந்துகொள்ளவும், அதில் வில்லங்கங்கள் ஏதேனும் உள்ளதா எனத் தெரிந்துகொள்ளவும் வில்லங்கச் சான்று பெறுவர். அதற்காக சார்பதிவாளர் அலுவலகத்தில் முறையாக விண்ணப்பித்து, உரிய கட்டணமும் செலுத்தி, அதிகபட்சமாக 10 நாட்களுக்குள் வில்லங்கச் சான்றினைப் பெற்று வந்தனர். 

வில்லங்கச் சான்று பெற காலதாமதமாவதால் அதனை துரிதப்படுத்தும் விதமாக கடந்த சில ஆண்டுகளுக்கு முன்னர் இணையத்தின் மூலம் விண்ணப்பித்து, வில்லங்கச் சான்றை விரைவாகப் பெறும் சேவையை துவக்கியது பதிவுத் துறை. இணையத்தின் மூலம் வில்லங்கச் சான்று பெற விரும்புவோர் உரிய கட்டணத்தை இணையத்தில் செலுத்தி தபால் மூலமாகவோ அல்லது சார்பதிவாளர் அலுவலகத்திலிருந்தோ இரண்டு நாட்களுக்குள் பெற்றுக் கொள்ளலாம்.

ஆனால் இடைத்தரகர்களின் குறுக்கீடு அதிகளவில் இருந்தமையாலும், மக்களிடம் உரிய வரவேற்பு இல்லாததாலும் இச்சேவை வெற்றி பெறவில்லை. இவை அனைத்திற்கும் தீர்வு காணும் விதமாக கடந்த சில வாரங்களுக்கு முன்னர், வீட்டிலிருந்தபடியே இணையத்தின் மூலம் வில்லங்கச் சான்றிதழை இலவசமாகப் பெறும் வசதியை துவக்கியுள்ளது தமிழக அரசின் பதிவுத்துறை. இதனால் பொதுமக்கள் வில்லங்கச் சான்று பெறுவதற்காக பத்திரப் பதிவு அலுவலகத்திற்குச் செல்லத் தேவையில்லை என்பதும் குறிப்பிடத்தக்கது.

இணையத்தின் மூலம் வில்லங்கச் சான்றிதழை இலவசமாகப் பெறுவது எப்படி?

தமிழகப் பதிவுத்துறையின் tnreginet.net என்ற இணையதளத்தில் வில்லங்கச் சான்றைப் பார்ப்பதற்கும், பதிவிறக்கம் செய்வதற்கும் தனி வசதி ஏற்படுத்தப்பட்டுள்ளது. இதில் To view Encumbrance Certificate என்ற லிங்க்கினை க்ளிக் செய்வதன் மூலம் வில்லங்கச் சான்றிதழை இலவசமாகப் பார்க்கும் அல்லது பெறும் வலைத்தளத்திற்குள் செல்லலாம்.

மேலும் http://ecview.tnreginet.net/ என்ற இணைய முகவரியின் மூலமாகவும் நேரடியாக வில்லங்கச் சான்றிதழைப் பெறும் வலைத்தளத்திற்குள் செல்லலாம்.

அந்தத் தளத்தில் கொடுக்கப் பட்டுள்ள பதிவு மண்டலம், பதிவு மாவட்டம், சார்பதிவாளர் அலுவலகம், சொத்து அமைந்துள்ள கிராமம், சர்வே எண், எத்தனை ஆண்டுகளுக்கு (தேதி மற்றும் மாதங்கள் உட்பட) வில்லங்கச் சான்றிதழ் தேவைப்படுகின்றன போன்ற விவரங்களை அளிக்க வேண்டும். அதுமட்டுமல்லாமல் பத்திரப் பதிவேட்டின் எண் மற்றும் பதிவு செய்யப்பட்ட சார்பதிவாளர்அலுவலக ஊர் முதலியவற்றைக் குறிப்பிடுவதன் மூலமும் வில்லங்கச் சான்று பெறலாம்.

பின்னர் அதே பக்கத்தில் கொடுக்கப்பட்டுள் ரகசியக் குறியீட்டு (PASSWORD) எண்ணை அளித்து, அதிகபட்சமாக 10 நிமிடங்களுக்குள் வில்லங்கச் சான்றிதழை இணையத்தில் பார்க்கலாம். மேலும் PDF FILE ஃபார்மெட்டில் வில்லங்கச் சான்றிதழை பதிவிறக்கமும் செய்துகொள்ளலாம்.

தமிழகத்திலுள்ள அனைத்து பத்திரப் பதிவு அலுவலகங்களும் கணினி மயமாக்கப்பட்டுள்ளதால் இணையத்தின் மூலம் வில்லங்கச் சான்றிதழை இலவசமாகப் பெறும் சேவையை தமிழக அரசு அறிமுகம் செய்துள்ளது.

தற்போது 1987-ஆம் ஆண்டு முதலும், அதற்குப் பின்னருமுள்ள ஆண்டுகளுக்கும் வில்லங்கச் சான்றிதழ் வழங்கப்பட்டு வருகின்றன. இச்சேவையை ஆரம்பித்த சில தினங்களுக்குள் சுமார் ஒரு லட்சத்து அறுபதாயிரம் நபர்கள் இணையத்தின் மூலம் வில்லங்கச் சான்றிதழைப் பார்த்துள்ளனர்" என்கிறார் பதிவுத் துறை அலுவலர் ஒருவர்

http://pettagum.blogspot.in/2014/10/blog-post_44.html


--

இது என் இறைவனின் அருட்கொடையிளிருந்து அருளப்பட்டது www.sahabudeen.com

கருஞ்சீரகத்தின் மருத்துவ பயன்கள்!

கருஞ்சீரகம் குறித்தும் அதன் நன்மைகளைக் குறித்தும் ஹதீஸ்களில் பல தகவல்கள் காணக்கிடைக்கின்றன.

"கருஞ்சீரகத்தில் மரணத்தைத் தவிர அனைத்து நோய்களுக்கும் நிவாரணம் உள்ளது" என்று அல்லாஹ்வின் தூதர் (ஸல்) அவர்கள் கூறினார்கள். அறிவிப்பாளர்: அபூஹுரைரா (ரலி) அவர்கள். (நூல்கள்: புகாரி, 5688. முஸ்லிம், 4451. திர்மிதீ, இப்னுமாஜா)

பொதுவாக கருஞ்சீரகம் எல்லா நோய்களுக்கும் மருந்தாகும் என்று நபி (ஸல்) அவர்கள் கூறியுள்ளார்கள். குளிர்ச்சியால் ஏற்படும் நோய்களுக்கு கருஞ்சீரகம் நல்ல நிவாரணியாகும்.

கருஞ்சீரகத்தை வறுத்துத் தூளாக்கி எண்ணெயில் ஊறவைத்துப் பிறகு மூக்கில் சொட்டுகள் விட்டால் கடுமையான ஜலதோஷம் நீங்கும்.கபம்,குளிர் காய்ச்சல், குறட்டை, மூக்கடைப்பு ஆகியவற்றுக்குக் கருஞ்சீரகம் நல்ல பலன் தரும்.

கருஞ்சீரகத்தைத் தூளாக்கி தேனில் கலந்து வெந்நீருடன் சாப்பிட்டால் மூத்திரக் கல்லைக் கரைத்து சிறுநீர் அடைப்பை அகற்றும். மாதவிடாய்ப் போக்கையும் சீராக்கும்.

கருஞ்சீரகப் பொடியை ஒரு துணியில் கட்டி உறிஞ்சி வந்தால் ஜலதோஷத்திற்கு நல்லது.

தாய்ப் பாலில் ஏழு கருஞ்சீரக வித்துகளை ஊறவைத்துப் பொடியாக்கி உறிஞ்சி வந்தால் மஞ்சள் காமாலை நோய் குணமாகும்.

5கிராம் கருஞ்சீரகத்தைத் தண்ணீருடன் கலந்து சாப்பிட்டால் சுவாசக் கோளாறு சீரடையும்.

கருஞ்சீரகத்தை அரைத்துப் பத்துப் போட்டால் தலைவலிக்கு நல்லது.

கருஞ்சீரகத்தைக் (vineger)ல் வேகவைத்து வாய் கொப்புளித்தால் பல் வலிக்கு நல்ல பலன் கிடைக்கும்.

கரும்பித்தம் மற்றும் கபத்தால் ஏற்படும் அஜீரணக் கோளாறை அகற்றுவதும் கருஞ்சீரகத்தின் தனிச் சிறப்பாகும்.

கருஞ்சீரகத்தை வறுத்துத் தூளாக்கி மெழுகு மற்றும் அல்லி எண்ணெயுடன் கலந்து தலையில் தேய்த்தால் தலைமுடி உதிர்வதைத் தவிர்க்கலாம்.

கருஞ்சீரக எண்ணெய் பக்கவாத நோய்க்குச் சிறந்த மருந்தாகும். நாய்க்கடி, பிரசவ இரத்தப் போக்குத் தடங்கல், கர்ப்பபை வலி, சிரங்கு, கண்வலி, போன்ற நோய்களுக்கும் கருஞ்சீரகம் நல்ல நிவாரணியாகும்.

தோல் நோய்களை குறைக்கும். பசியைத்தூண்டும். சீரணத்தை சீர்படுத்தும். வயிற்றுப் போக்கை குணப்படுத்தும். புழுக்கொல்லியாக செயல்படும். வாந்தியைத் தடுக்கும். இதய வலியை குறைக்கும். சிறுநீர் சுரப்பிகளை தூண்டும். பால் சுரப்பைக் கூட்டும். 

* கருஞ்சீரகத்தைத் தூளாக்கி தேனில் கலந்து வெந்நீருடன் சாப்பிட்டால் சிறுநீரக‌ கல்லைக் கரைத்து சிறுநீர் அடைப்பை அகற்றும்.

* சிறிதளவு கருஞ்சீரகத்தை பசும்பால் விட்டு அரைத்து முகத்தில் பூசி ஊறிய பின் கழுவி வர முகப்பரு மறையும்.

* கருஞ்சீரகத்தை நீர் விட்டு, அரைத்து, நல்லெண்ணையிëல் குழைத்து கரப்பான், சிரங்கு ஆகியவற்றில் பூசி வர குணம் தெரியும்.

* கருஞ்சீரகத்தை தேன் விட்டு அரைத்து பிரசவித்த பின் ஏற்படும் வலிக்குப்பூசிட வலி மாறும்.

* கருஞ்சீரகத்தை அரைத்து தேமல் மேல் பூசி வர தேமல் சிறிது சிறிதாக மாறும்.

* கருஞ்சீரகத்தை வறுத்து காடி விட்டு அரைத்து சொறி, தேமல் மேல் பூசி வர தேமல், சொறி மறையும்.

* கருஞ்சீரகத்தையும், தும்மட்டிக்காயையும் சேர்த்து அரைத்து விலாப்பக்கம் பூசி வர குடல் பூச்சிகள் வெளியேறி விடும்.

* கருஞ்சீரகப்பொடி, மல்லிப்பொடி இரண்டையும் பாலில் கலந்து சாப்பிட அஜீரணம் மாறும்.

* கருஞ்சீரகப்பொடியை தயிரில் கலந்து சாப்பிட அஜீரணம் மற்றும் வாயு உற்பத்தி மாறும்.

* கருஞ்சீரகத்தை எருமைப்பால் விட்டு அரைத்து முகத்தில் தடவி வர முகப்பரு மாறும்.

* கருஞ்சீரகத்தை வெற்றிலை சாறு விட்டு அரைத்து காது, கன்னப் பகுதியில் ஏற்படும் வீக்கம் மேல் பற்று போட வீக்கம் மறையும்.

* கைப்பிடி கீழா நெல்லி இலைகளோடு ஒரு ஸ்பூன் கருஞ்சீரகம் சேர்த்து சிறிதளவு பால் சேர்த்து அரைத்து பின் இதை ஒரு கப் பாலில் கலந்து காலை உணவுக்கு அரை மணி நேரம் பின் மற்றும் மாலை நேரம் பருகி வர மஞ்சட்காமாலை குணமாகும்

கருஞ்சீரகத்தின் சிறந்த நோய் நிவாரணி என்று நிரூபிக்கப்பட்டுள்ளன.

http://pettagum.blogspot.in/2014/10/blog-post_63.html


--

இது என் இறைவனின் அருட்கொடையிளிருந்து அருளப்பட்டது www.sahabudeen.com

ஆண்ட்ராய்டு போன்… பாதுகாக்கும் வழிகள்!

இன்றைக்கு அனைவரின் தேர்வாகவும் இருக்கிறது ஆண்ட்ராய்டு ஸ்மார்ட் போன். விண்டோஸ் ஸ்மார்ட் போன்கள் பயன்பாட்டுக்கு எளிதாக இல்லை என்பதே இதற்குக் காரணம். ஆண்ட்ராய்டு போன்களை பாதுகாப்பாக வைத்திருக்கவில்லை எனில், அதில் பதிந்து வைத்திருக்கும் தகவல்கள் அனைத்தும் களவுபோக வாய்ப்புண்டு. தவிர, வைரஸ்களின் தாக்குதலுக்கு உள்ளாகி, சீக்கிரத்தி லேயே செயல் இழக்கவும் செய்யும். ஆண்ட்ராய்டு போன்களை பாதுகாப்பது எப்படி என்று சொல்கிறார் தொழில்நுட்ப வல்லுநர் பிரபு கிருஷ்ணா.
ஸ்கிரீன் லாக்!
எல்லா ஆண்ட்ராய்டு போன்களுக்கும் இதுதான் அடிப்படையான பாதுகாப்பு வசதி. இதில் பேட்டர்ன், பின் (PIN), பாஸ்வேர்டு என்ற மூன்றும் எல்லா ஆண்ட்ராய்டு போன்களிலும் இருக்கும். செக்யூரிட்டி செட்டிங்ஸ் பகுதியில், இதில் ஏதாவது ஒன்றைப் பயன்படுத் துவது கட்டாயம்.
இதுமாதிரியான எந்த பாதுகாப்பும் இல்லாத போன்கள் தொலைந்து, அது இன்னொருவர் கையில் கிடைக்கும் போது, அந்த போன்களில் இருக்கும் அனைத்து விஷயங்களையும் ஒருவர் எளிதாக எடுத்து பயன்படுத்திக் கொள்வதைத் தடுக்க இது ஒரு சிறந்த வழி.
என்க்ரிப்ட் வசதி!
மேலே சொன்ன செக்யூரிட்டி செட்டிங்ஸ் பகுதியில் ஸ்கிரீன் லாக் பகுதிக்குக் கீழ் 'என்க்ரிப்ட்' என்ற வசதி இருக்கும். இந்த வசதியைப் பயன்படுத்துவதன் மூலம் போனில் இருக்கும் முக்கியமான தகவல்கள் அனைத்தும் 'என்கிரிப்ட்' செய்யப்பட்டுவிடும். ஒவ்வொருமுறை போனை ஆன் செய்யும்போதும் நாம் 'டிகிரிப்ட்' செய்தால் மட்டுமே பயன்படுத்த முடியும். இதனால் நம் போன் தொலைந்துபோனாலும் முக்கியமான தகவல்களை யாராலும் திருட முடியாது.
ஆண்ட்ராய்டு டிவைஸ் மேனேஜர்!
செக்யூரிட்டி செட்டிங்ஸ் பகுதியில் அடுத்ததாக இருக்கும் வசதிதான் இது. இதன்மூலம் நமது போன் காணாமல் போகும்போது android.com/devicemanager என்ற முகவரிக்குச் சென்று, ஐந்து நிமிடங்களுக்கு போனை தொடர்ச்சியாக ரிங் ஆகும்படி அல்லது டிவைஸ் லாக் ஆகும்படி அல்லது தகவல்கள் அனைத்தையும் அழிக்கும்படி (Erase) செய்ய முடியும். இதற்கு, போனில் இணைய இணைப்பு இருக்க வேண்டும். அதேபோல, போன் சுவிட்ச்ஆஃப் ஆகி இருக்கவும் கூடாது. இதுவும் ஒருவகையில் குறைந்தபட்ச பாதுகாப்பு வசதிதான்.
அலுவலக/பொது இணையத்தைப் பயன்படுத்துதல்!
பிரபல ஆன்ட்டிவைரஸ் நிறுவனமான ESET சொல்லும் கணக்கின் படி, அலுவலகங்களில் வை-ஃபை மூலம் இணையத்தைப் பயன்படுத்து வதால், 30-40% வைரஸ் பிரச்னையால் பாதிக்கப்படும் வாய்ப்புள்ளது. அலுவலகத்தில் வை-ஃபை பயன்படுத்துவதற்குமுன், அது எந்த அளவுக்கு பாதுகாப்பானது என்பதை நெட்வொர்க் அட்மினிடம் கேட்டு, அதற்குப் பிறகு பயன்படுத்துவது பாதுகாப்பானது.
இதேபோல, பொது இடங்களில் கிடைக்கும் இலவச வை-ஃபை இணைப்பின் பாதுகாப்பும் கேள்விக்குரியதே. பொது இடங்களில் கட்டாயம் இணையம் பயன்படுத்த வேண்டிய அவசியம் உள்ளவர்கள், 2ஜி/3ஜி டேட்டா ரீசார்ஜ் செய்து பயன்படுத்துவதுதான் பாதுகாப்பானது.
முக்கியமான தகவல்கள் பத்திரம்!
உங்களுக்கு மிக முக்கியமானதாகத் தோன்றும் எந்தத் தகவலையும் உங்கள் போனில் பதிவு செய்து வைக்காதீர்கள். இதனால் போன் திருடுபோவது தவிர, போன் பழுதாகி அதை சர்வீஸ் சென்டரில் தரும்போதும் பாதுகாப்பாக இருக்க முடியும்.
நம்பகமில்லா அப்ளிகேஷன்கள் வேண்டாம்!
குறிப்பிட்ட அப்ளிகேஷன் ஒன்றை டவுன்லோடு செய்யும்முன் அதன் தேவை, பாதுகாப்பு போன்றவற்றைத் தெரிந்துகொண்டு டவுன்லோடு செய்வது நல்லது.
குறிப்பாக, கூகுள் ப்ளே இல்லாமல் வேறு எங்கிருந்தும் இன்ஸ்டால் செய்யப்படும் அப்ளிகேஷன்கள் போனுக்குப் பாதுகாப்பானதில்லை.
அப்ளிகேஷன் லாக்!
முக்கியமான தகவல்கள் இருக்கும் கேலரி, இன்பாக்ஸ், மெயில் அப்ளிகேஷன்களை எப்போதும் லாக் செய்து வைக்கலாம்.
இதெற்கென்றே கூகுள் ப்ளேயில் நிறைய அப்ளிகேஷன்கள் உள்ளன. இது, ஒவ்வொருமுறை குறிப்பிட்ட அப்ளிகேஷனை ஓப்பன் செய்யும்போதும் ஒரு பாஸ்வேர்டு/பின் (PIN) நம்பர் கேட்கும்.
ரூட் (Root) செய்ய வேண்டாம்!
போனை ரூட் செய்வது என்பது நம் விண்டோஸ் கணினியில் அட்மின் கணக்கை பயன்படுத்துவதுபோல. இதன்மூலம் போனுக்குத் தேவையான லேட்டஸ்ட் ஆபரேட்டிங் சிஸ்டம் முதல், இயங்காத அப்ளிகேஷனை இயங்கவைப்பது வரை என பல்வேறு வசதிகள் கிடைக்கும்.
ஆனால் ரூட் அக்சஸ் உள்ள அப்ளிகேஷன், போனில் உள்ள தகவல்கள் அனைத்தையும் அறியும் வசதியைப் பெறும். இதனால் பாதுகாப்பற்ற ஏதேனும் ஒரு அப்ளிகேஷன் மூலம் நமது தனிப்பட்ட தகவல்கள் திருடப்படலாம்.
பிரவுஸர்கள் எச்சரிக்கை!
போனில் பிரவுஸர்களைப் பயன்படுத்தும்போது பாஸ்வேர்டு அல்லது இதர தகவல்களைக் கொடுத்தால், பயன்படுத்தி முடித்தபின் ஹிஸ்டரியை அழித்துவிடுவது (Delete) முக்கியமானது.
அதேபோல, பணப் பரிவர்த்தனை தொடர்பான வேலைகளுக்கு குறிப்பிட்ட அப்ளிகேஷனை டவுன்லோடு செய்வதுதான் பாதுகாப்பானது.
அப்டேட் அவசியம்!
போனின் சாஃப்ட்வேரை புதிய வெர்சனுக்கு அப்டேட் செய்துவைத் திருப்பது அவசியமான ஒன்று. அதேபோல, அப்ளிகேஷன்களுக்கும் அப்டேட் வசதி வரும்போதெல்லாம் அதைச் செய்துகொள்ள வேண்டும்.
ஆனால், அந்தசமயங்களில் எச்சரிக்கையுடன் இருக்க வேண்டும். அப்ளிகேஷன்கள் நம்மிடம் கேட்கும் அனுமதிகளை நன்கு படித்துப் பார்த்த பிறகே, அனுமதி வழங்க வேண்டும்.
போன் தொலைந்துவிட்டால்..?
இறுதியாக, இத்தனை பாதுகாப்பாக இருந்தும் உங்கள் போன் தொலைந்துபோய்விட்டால், முதலில் நீங்கள் செய்ய வேண்டியது ஜிமெயில், ஃபேஸ்புக் போன்றவற்றின் பாஸ்வேர்டை மாற்றுவது.
அடுத்தபடியாக, 'ஆண்ட்ராய்டு டிவைஸ் மேனேஜர்' மூலம் போனில் இருக்கும் தகவல்களை அழிக்க முயற்சி செய்வதுதான்.
ஆண்ட்ராய்டு போனின் பாதுகாப்புக்கான வழிகளைச் சொல்லிவிட்டோம். இந்த வழிகளை நீங்களும் பின்பற்றலாமே!
http://karpom.com/2014/11/10-tips-to-protect-your-android-device.html


--

இது என் இறைவனின் அருட்கொடையிளிருந்து அருளப்பட்டது www.sahabudeen.com

முஹாசபா எனப்படும் சுயவிசாரணை

Posted by: மவ்லவி M.I. அன்வர் (ஸலஃபி)  

மனிதன் தவறு செய்யமாட்டான் என்பதற்கு எந்த உத்தரவாதமும் இல்லை. மறதியும் தவறும் அவனோடு ஒட்டிக்கொண்ட அட்டைகள் போல் எனலாம். இதை அல்-குர்ஆன் அல்-ஹதீஸ் பட்டவர்த்தனமாக பிரஸ்தாபிக்கின்றன. இதற்கு முதல் மனிதர் ஆதம் (அலை) அவர்களின் வரலாற்றுத் தவறு ஒரு வலுவான உதாரணமாகும். எனினும் தான் செய்த தவறுகளை நினைத்து மனம் திருந்துபவனே மனிதப் புனிதன் என்று ஒரு நபிமொழி கூறுகிறது. "ஆதமின் மக்கள் அனைவரும் தவறு செய்யக்கூடியவர்கள். எனினும் அவர்களுல் சிறந்தவர்கள் தம் தவறை உணர்ந்து திருந்துபவர்களே." (புஹாரி)
இந்தவகையில் ஒவ்வொரு முஸ்லிம் ஆணும் பெண்ணும் தவறுகளிலிருந்து மீள்வதற்கும் அவற்றிலிருந்து தன்னை தற்காத்துக் கொள்வதற்கும் பின்வரும் கேள்விகளை தன்னைத் தானே கேட்டுக் கொண்டு அதற்கு விடை காண முயல்வது ஒவ்வொருவரது வாழ்க்கையையும் வெற்றிகரமாக அமைத்துக் கொள்ள ஏதுவாக அமையும். இவ்வாறு தன்னைத்தானே விசாரிப்பது இஸ்லாமிய பரிபாஷையில் சுயவிசாரனை எனப்படும்.
உமர் (ரழி)அவர்கள் "நீங்கள் விசாரிக்கப்பட முன்னர் உங்களை நீங்களே விசாரித்துக் கொள்ளுங்கள், நீங்கள் கணிப்பிட்டுப் பார்க்கப்பட முன் உங்களை நீங்களே கணிப்பிட்டுப் பார்த்துக் கொள்ளுங்கள்" என்றும் குறிப்பிட்டுள்ளார்கள்." உமர் (ரழி) அவர்கள் தன்னைத்தானே விசாரித்துக் கொள்வதுடன் தனக்குத்தானே தண்டனையையும் விதித்துக் கொண்டுள்ளார்கள்.
எல்லாவற்றுக்கும் மேலாக சுவனத்தின் வாயில்கள் திறக்கப்பட்டு நரகத்தின் வாயில்கள் மூடப்படும் புனிதமிகு ரமழான் மாதத்தை எதிர் நோக்கியுள்ள எமக்கு இது ஒரு சிறந்த பயிற்சியாக கூட அமையலாம்.
1. பள்ளிவாயலில் இந்தக் கிழமை ஐவேளைத் தொழுகைகளையும் உரிய நேரத்திற்கு ஜமாஅத்தாக தொழுது வந்தாயா? குறிப்பாக முனாபிக்குகளுக்கு மிக சுமையான அஸர் சுபஹ் ஆகிய தொழுகைகளை பேணி தொழுது வந்தாயா?
2. கடமையான தொழுகைகளுக்கு பின் ஓத வேண்டிய அவ்ராதுகளையும் திக்ருகளையும் ஓதி வந்தாயா? அதன் முன் பின் சுன்னத்தான தொழுகைகளை தொழுதாயா?
3. இந்தக் கிழமையில் அல்-குர்ஆனை ஓதி வந்தாயா? அதன் கருத்துக்களை கற்றுக்கொள்வதற்கு முயற்சி செய்தாயா? அவற்றை விளங்குவதற்கும் அதன் வழி நடப்பதற்கும் முயற்சி செய்தாயா?
4. நபி (ஸல்) அவர்களின் பொன் மொழிகளை வாசித்தாயா? அதன் போதனைகளை விளங்கினாயா? அவற்றை வாழ்வில் நடைமுறைப் படுத்தினாயா?
5. அதிக சிரிப்பையும் கேளிக்கைகளையும் தவிர்க்க நினைத்தாயா? உலக வாழ்வின் உண்மையான தத்துவத்தைப் புரிந்து மரணம் மறுமை வாழ்வு பற்றி சிந்தித்தாயா? அதன் பயங்கரம் அகோரம் என்பவற்றை நினைத்து கண்ணீர் விட்டு தனிமையில் அழுதாயா?
6. பொறாமை பெருமை கர்வம் முகஸ்துதி, குரோதம் போன்ற தீய உள நோய்களிலிருந்தும், பொய்யுரைத்தல், கோள், வீண்வாதம், கேளிக்கைகள் போன்ற தீய உணர்வுகளிலிருந்தும் உன்னை, உனது உள்ளத்தை பாதுகாத்துக் கொண்டாயா?
7. துஆக்களுக்கு அல்லாஹ் பதிலளிக்கின்ற நேரங்களைப் பார்த்து பிரார்த்தனை செய்தாயா? அல்லாஹ்வின் மார்க்கத்தில் உனது உள்ளம் நிலைத்திருக்க அவனை வேண்டினாயா?
8. உன் தாய், தந்தையருக்கு நன்றியுடையவனாக இருக்க வேண்டுமென்ற வகையில் அவர்களுக்காகப் பிரார்த்தித்தாயா? நண்பரகள், உறவினர்களுக்காகவும் பிரார்த்தனை செய்தாயா?
9. உனது நண்பர்களுடன் எவ்வாறு நடந்து கொண்டாய்?. தீய நண்பர்களை விட்டும் ஒதுங்க நினைத்தாயா?
10. உன்னை விட அறிவில், அழகில் உடலமைப்பில் உயர்ந்தவர்களை, தாழ்ந்தவர்களைக் கண்ட போது அல்லாஹ் உனக்கருளிய அருளையிட்டு அவனுக்கு நீ நன்றி செலுத்தினாயா?
11. அல்லாஹ் உனக்கு அருளிய ஓய்வு நேரத்தையும் ஆரோக்கியத்தையும் அவனுக்கு பொருத்தமான முறையில் பயன்படுத்தினாயா?
12. உனது பொழுது போக்கு எவ்வாறு இருந்தது? அல்லாஹ் திருப்திப்படும் விதத்தில் அவை அமைந்திருந்ததா?
13. நன்மைகள் உன்னை அடைந்த போது அல்லாவுக்கு நன்றி செலுத்தினாயா? துன்பங்கள் அணுகிய போது பொறுமையுடன் இன்னாலில்லாஹி வஇன்னா இலைஹி ராஜிஊன் என்று கூறினாயா?
14. உன்னை விட வயது முதிந்தவர்களைக் கண்ணியப்படுத்தி இளம் வயதினர்களுடன் அன்பாக நடந்து கொண்டாயா?
15. காலை, மாலை திக்ருகளை ஓதி வந்தாயா?
16. அல்லாஹ்வுடைய பாதையில் உனது பணத்தில் இருந்து செலவளித்தாயா? எவ்வளவு செலவளித்தாய்?
17. நீ உண்ணும் உணவு, உடுக்கும் உடை, அருந்தும் பானங்கள் போன்ற இன்னோரன்ன அம்சங்களில் அல்லாஹ்வை பயந்து ஹலால் ஹராம் பேணினாயா?
18. நன்மையை ஏவி தீமையைத் தடுப்பதில் எவ்வளவு தூரம் பங்கு கொண்டாய்? எவ்வளவு தூரம் தூய்மையாக நடந்து கொண்டாய்?
19. இறைவனைப் புகழும்போது அவனது படைப்புக்களைப் பார்க்கும்போதும் உனது மனநிலை எவ்வாறிருந்தது? அல்லாஹ்வுக்கு நன்றி செலுத்தினாயா?
20. நீ செய்த தீய செயல்களை நினைத்து வருந்தி மீண்டும் அதனை செய்யமாட்டேன் என்று உறுதி பூண்டு அல்லாஹ்விடம் தௌபாச் செய்தாயா? பாவமன்னிப்பு (இஸ்திஃபார்) செய்தாயா?
இது போன்ற கேள்விகளைத் தன்னிடம் தானே கேட்டு விசாரித்துக் கொள்வதுடன் தன்னில் காணப்படும் குறைகளை நிவர்த்தித்துக் கொள்ள முடியும். நமது வாழ்வில் தொடர்ந்து கடைப்பிடிப்போமாக!


--

இது என் இறைவனின் அருட்கொடையிளிருந்து அருளப்பட்டது www.sahabudeen.com

மென்பொருள் பதிவிறக்கமா? இதோ சில விதிகள்.

அடிக்கடி இந்தத் தளத்திலும் இலவச மென்பொருள் பற்றிய பதிவுகள் வருவதால் மீண்டும் கணினி பற்றி எச்சரிக்கையாக இருக்க சில உதவிகள்.

இலவசமாகக் கிடைக்கும் பொருட்களினால், கணினிகள் பாதிப்பு அடையும் வாய்ப்புகள் அதிகமாகவே உள்ளன. ஆகவே, இணையத்தில் இருந்து பதிவிறக்கம் செய்யும் போது, நல்ல சில வழிமுறைகளைக் கையாள வேண்டும். மென்பொருளை பரீட்சித்து விட்டு நீக்கினாலும் கணினி வந்தட்டகத்தில் இருந்து முற்றாக நீக்கப்படுவதில்லை என்பதை கவனிக்க வேண்டும்.

நேற்றைய பதிவில் இரண்டு தினங்களுக்கு இடையில் உள்ள நாட்களை கணிக்க மென்பொருள் பற்றிச் சொல்லப்பட்டது. இந்த கணக்கை கணியில் உள்ள வசதி மூலமே கணிக்க முடியும்.Excel,office இவை மூலமும் தெரிந்து கொள்ள முடியும். இப்படி பல நிரலிகள் பயனற்றவை,எப்போதோ ஒரு நாள் பாவிக்கப்படுபவை.

1.    இலவசம் என்று தெரிந்ததும் கிடைக்கின்ற எல்லா மென்பொருட்களையும் கணினியில் பதிப்பு செய்யும் ஆசையை முற்றாகத் தவிர்த்து விடுங்கள். பதிவிறக்கம் செய்யப்படும் நிரலி மிகவும் பயனுள்ளதாக இருந்தால் மட்டுமே கணினியில் நிறுவிக் கொள்ளலாம்.

2.    பதிவிறக்கம் செய்யப்படும் நிரலி அல்லது நிரலிகளை ஒருமுறை மட்டும் தான் பயன் படுத்த முடியும் என்றால், தயவு செய்து அந்த நிரலிகளைப் பதிவிறக்கம் செய்யவே வேண்டாம். 

3.    எந்த ஓர் இலவச நிரலியையும், அதனுடைய தயாரிப்பு இணையத் தளத்தில் இருந்து பதிவிறக்கம் செய்வதைக் கண்டிப்பாகத் தவிர்த்து விடுங்கள். ஏனென்றால் தங்களின் நிரலியைப் பற்றி அவர்களே தரம் உயர்த்திப் பேசுவார்கள். ஆதலால் உண்மை நிலையை நம்மால் கண்டறிய முடியாது.

4.    இலவச நிரலிகளைத் தரம் பிரித்து அவற்றை முறையாக  தொகுத்து வழங்கும் தளங்களான cnet, brothersoft, majorgeek, softpedia, filehippo, tucows, pcworld போன்ற நம்பிக்கையான தளங்களில் இருந்து பதிவிறக்கம் செய்து கொள்ளுங்கள்.

5.    நம்பிக்கையான தளங்களில் இருந்து பதிவிறக்கம் செய்தாலும், மற்ற கணினிப் பயனர்களின் கணிப்பும் விமர்சனங்களும் எப்படி உள்ளன என்பதையும் கண்டறியுங்கள். (Reviews).

6.    cnet, tucows, pcworld  போன்ற பிரபல தளங்களில் இருந்து பதிவிறக்கம் செய்யும் போது, தகுதி மதிப்பீடு (Product Ranking) 1 அல்லது 2 க்குள் இருக்கிறதா என்பதை உறுதிப் படுத்திக் கொள்ளுங்கள். மதிப்பீடு 3 ஆக இருந்தால் பரவாயில்லை. ஆனால், 4 அல்லது 5 க்குப் போனால் அந்த நிரலியைப் பதிவிறக்கம் செய்ய வேண்டாம்.

7.    ஒரு தளத்தில் இருந்து ஒரு நிரலியைப் பதிவிறக்கம் செய்யும் போது கடந்த காலங்களில் எத்தனை பேர் அதனைப் பதிவிறக்கம் செய்து இருக்கிறார்கள் என்பதையும் கவனியுங்கள். அதிகமானோர் பதிவிறக்கம் செய்து இருந்தால் அந்த மென்பொருள் அப்போதைய சமயத்தில் நன்றாக இருக்கிறது என்று பொருள்.  ஆக, அந்த நிரலியை தயக்கம் இல்லாமல் பதிவிறக்கம் செய்யலாம். 

8.    அடுத்து, கணினியில் ஒரு வேலையைச் செய்ய ஒன்றுக்கும் மேற்பட்ட நிரலிகளைக் கணினியில் வைத்து கொள்ள வேண்டாம். எடுத்துக்காட்டாக Video Players, PC Cleaners, Photo Editors, Downloaders. இவற்றில் ஒவ்வொன்றிலும் உங்களுக்கு பிடித்த ஒரே ஒரு நிரலியை மட்டும் கணினியில் வைத்து கொள்ளுங்கள். தேவையில்லாத மற்ற நிரலிகளை அப்புறப் படுத்தி விடுங்கள்.

9.நிரலிகளை பதிவிறக்கம் செய்யும் முன்னர் அதற்கு மாற்றான வேறு நல்ல நிரலிகள் இருக்கின்றனவா என்பதை கண்டறியுங்கள். அதிக வசதிகள் நல்ல தளம்,பலரின் பதிவிறக்கம் இவற்றைக் கண்டு பதிவிறக்கலாம்.

தங்கள் படங்கள் பற்றி தொலைக்காட்சியில் நடிகர்,இயக்குனர்கள் அதிகமாக சொல்வார்கள். அதை நம்பி திரையரங்கம் சென்றால் நாம் மோசம் போனது தெரியவரும். சில தளங்களில் சினிமா விமர்சனங்கள் வரும்.அதைப் பார்த்து விட்டுச் செல்லலாம்.அதுபோல இலவச மென்பொருள் பதிவிறக்கமும் இருக்க வேண்டும்.

இந்த வழிமுறைகளைப் பின்பற்றுங்கள். உங்கள் கணினி உங்கள் பேச்சைக் கேட்கும். இல்லை என்றால் மன்னியுங்கள். அம்மி மிதிக்காது. அருந்ததியையும் பார்க்காது.

சிலர் உலகத்தில் உள்ள எல்லாமே தங்கள் கணினிக்குள் இருக்க வேண்டும் என்று ஆசைப்படுவார்கள். அது தப்பு. கணினி வேகமாக வேலை செய்ய வேண்டும் என்றால் கண்ட கண்ட குப்பைகளைக் கணினிக்குள் சேர்த்து வைக்காதீர்கள்.

http://www.puthiyatamil.net



--

இது என் இறைவனின் அருட்கொடையிளிருந்து அருளப்பட்டது www.sahabudeen.com

உங்கள் பாப்பா பாதுகாப்பாக இருக்கிறதா?

நுங்கம்பாக்கத்தில் வசிக்கும் ப்ரீத்தி - சூரி தம்பதி இருவரும் தகவல் தொழில்நுட்ப நிறுவனம் ஒன்றில் வேலை பார்க்கின்றனர். கை நிறையச் சம்பளம். ஏராளமான சலுகைகள். இளமையில் ஓடி ஓடி உழைத்தவர்களுக்கு, தங்கள் குழந்தைகளின் சிரிப்பையும் ஒவ்வோர் அசைவையும் வளர்ச்சியையும் பார்த்து ரசிக்க முடியவில்லையே என்ற வேதனை. ஒரு கட்டத்தில் சம்பாதித்தது போதும் என்று வேலையை உதறிவிட்டனர். வருமானத்துக்காக உழைத்த காலத்தில் தங்கள் குழந்தைகளைக் காப்பகத்தில் விட்டுவிட்டு அலுவலகத்துக்கு ஓடும் இந்தப் பரபரப்பான வாழ்க்கையில் தங்களுக்கு ஏற்பட்ட சிக்கலான அனுபவமே 'காஞ்சனா பாட்டி குழந்தைகள் காப்பகங்கள்' உருவாவதற்கு இவர்களுக்கு விதையாக அமைந்து இருக்கிறது. இன்று சென்னையில் 14 இடங்களில் குழந்தைகள் காப்பகங்களை நடத்திவருகிறார்கள் ப்ரீத்தி-சூரி.   

பிறந்து மூன்றே மாதங்களே ஆன பச்சிளம் குழந்தைகளைத் தாயின் அரவணைப்புடன் பாதுகாக்கும் குழந்தைக் காப்பகங்கள் எப்படி இருக்க வேண்டும்? என்னென்ன வசதிகள் தேவை? என்பது பற்றி ப்ரீத்தி - சூரியும், ஆயாவின் மடியில் தவழும் குழந்தைகளின் ஆரோக்கியம்குறித்துக் குழந்தைகள் நல மருத்துவர் ஸ்ரீனிவாசனும் இங்கே விரிவாகப் பேசுகின்றனர்.
''இரண்டு மாதக் குழந்தை தனது அம்மாவின் முகம் பார்த்துச் சிரிக்கும். மூன்று மாதங்களில் தலை நிற்கும். நான்கு முதல் ஐந்து மாதங்களில் கவிழ்ந்து படுக்கும். ஏழு முதல் எட்டு மாதங்களில் உட்காரும். ஒன்பது, பத்து மாதங்களில் நிற்கும். ஒரு வயதில் நடக்க ஆரம்பிக்கும். ஒரு சில குழந்தைகளுக்கு இந்தச் செயல்பாடுகளுக்கான காலம் வேறுபடலாம். இப்படிக் குழந்தை படிப்படியாக உடல் வளர்ச்சியில் முன்னேறி, தத்தித் தத்தி நடந்து வரும் அழகை இன்றைய பெற்றோர்கள் ரசிக்க முடியாமல் போய்விடுகிறது. உடல் மற்றும் மனரீதியான வளர்ச்சிக்கான பருவம் இந்த மழலைப் பருவம். உடல் நல்ல ஆரோக்கியமாக இருந்தால்தான், அந்தக் குழந்தையின் வருங்காலம் நன்றாக இருக்கும். எனவே, குழந்தையுடன் செலவிட முதல் ஐந்து வருடங்களை ஒதுக்குங்கள். ஒருவேளை தவிர்க்கவே முடியாமல் காப்பகங்களில் கொண்டுபோய்விட நேரிட்டால், இந்தப் பாதுகாப்பான வழிகளைக் கடைப்பிடியுங்கள்'' என்றவர்கள் காப்பகத்தில் குழந்தைகள் நலமாக இருப்பதற்கான வழிகளைப் பட்டியலிட்டனர்.

குழந்தை எப்போதும் குதூகலமாக இருக்க...
 பிறந்து ஆறு மாதங்கள் வரை குழந்தைக்குத் தாய்ப்பால் மட்டுமே கட்டாயம் தர வேண்டும்.
 
முடிந்தவரை ஆறு மாத விடுப்பைக் கட்டாயமாக்கிக்கொள்வது நல்லது.  
 குழந்தை எட்டு மணி வரைக்கும் தூங்கட்டும் என்று விட்டுவிட்டு எல்லா வேலைகளையும் முடித்துக்கொண்டு பிறகு அவசர அவசரமாக எழுப்பிக் குளிக்க வைத்து, பால் மற்றும் உணவைக் கொடுத்துக் காப்பகத்தில் கொண்டுவிடும் பெற்றோர்கள்தான் அதிகம். இதனால் குழந்தையும் சரியாகச் சாப்பிடாது. ஆற அமரக் குழந்தையுடன் விளையாட்டுக் காட்டியபடியே சாப்பாட்டை ஊட்டுங்கள். குழந்தையும் ஆர்வமாகச் சாப்பிடும்.
 சூடான சாதத்தைக் குழையப் பிசைந்து ஊட்டும்போது, குழந்தை நன்றாகச் சாப்பிடும். மதியம், மாலை உணவுகளையும் தயாரித்துத் தரும் காப்பகங்களைத் தேர்ந்தெடுக்கலாம்.
 மருத்துவ ஆலோசகர்கள் இருக்கிறார்களா அங்கு இருக்கும் ஒவ்வொரு குழந்தையைப் பற்றிய அனைத்துத் தகவல்களையும் பதிவு செய்திருக்கிறார்களா என்பனவற்றைக் கவனியுங்கள். உங்கள் குழந்தையின் ரத்த வகை, ஒவ்வாமை, குடும்ப மருத்துவர், உணவு முறைகள், கொடுக்கும் மாத்திரை மருந்துகள்பற்றிய அனைத்து விவரங்களையும் நீங்களே, ஒரு ஃபைலில் போட்டுத் தந்துவிடலாம்.  
பிஞ்சுக் குழந்தைகளுக்கு அடிக்கடி நோய்த்தொற்று ஏற்படும். மூக்கில் சளி, இருமல், லேசான காய்ச்சல் இருந்தால், அலுவலகத்துக்கு விடுப்பு எடுத்துக்கொண்டு குழந்தையை வீட்டுக்கு அழைத்துச் சென்று கவனிப்பது உத்தமம்.
குழந்தைகள் உடுத்துவதற்குத் தளர்வான மெல்லிய பருத்தி ஆடைகளைப் பயன்படுத்தினால், குழந்தைகளுக்குத் தோல் தொடர்பான பிரச்னை வராமல் இருக்கும். காய்ச்சி ஆறவைத்த நீரை, நன்கு கிருமி நீக்கம் செய்யப்பட்ட பாட்டிலில் ஊற்றிக்கொடுக்கலாம்.
ஒரு வயதைக் கடந்துவிட்டால், குழந்தையைக் குடும்பத்தினருடன் ஒன்றாக உட்கார்ந்து சாப்பிடப் பழக்குங்கள். இதனால் காப்பகத்துக்குச் செல்லும்போது மற்ற குழந்தைகளுடன் அது சேர்ந்து சாப்பிடும்.
  மண்ணில் விளையாடும்போது குழந்தைகளுக்குத் தோலில் அரிப்பு, கொப்புளங்கள் வரலாம். காப்பகத்தில் ஒவ்வொரு குழந்தைக்கும் தனித் தனி சோப்பைப் பயன்படுத்துவதை உறுதிப்படுத்திக்கொள்ளுங்கள்.  
குழந்தைக் காப்பகத்தைக் கவனமாகத் தேர்ந்தெடுக்க மேலும் சில யோசனைகள்...
தரை தளத்தில் இயங்கும் காப்பகங்களைத் தேர்ந்தெடுங்கள்.
 குழந்தைகள் ஓடி விளையாடக்கூடிய அளவுக்கு இடம் தாராளமாக இருக்க வேண்டும். வெளிச்சமும் காற்றோட்டமும் நன்கு இருக்க வேண்டும். காப்பகத்தில் இருக்கும் கதவு, ஜன்னல், டேபிள் எல்லாவற்றின் முனையும் கூர்மையாக இருக்கக் கூடாது என்பதைக் காப்பகம் நடத்துபவர்களிடம் வலியுறுத்துங்கள்.

 ஏ.சி. இல்லாமல் இருப்பதே குழந்தைகளின் உடல் நலத்துக்கு நல்லது.
 சிறிய அறையில் அளவுக்கு அதிகமான குழந்தைகள் இருக்கின்றன என்றால், அந்தக் காப்பகத்தைத் தவிர்ப்பது நல்லது.  
 மூன்று குழந்தைகளுக்கு ஓர் ஆயா என்கிற ரீதியில் இருந்தால்தான் அவரால் ஒவ்வொரு குழந்தையின்மீதும் அக்கறையுடன் தனிக் கவனம் செலுத்த முடியும்.
காப்பகத்தில் உள்ள ஆயாக்கள், முதலுதவிப் பயிற்சி பெற்று இருக்கிறார்களா என்பதைத் தெரிந்துகொள்ளுங்கள்.  
ஆயாக்களின் உடை மற்றும் விரல் நகங்கள், கை, கால்களைச் சுத்தமாக வைத்திருக்கிறார்களா என்பதைக் கவனியுங்கள்.
 உங்கள் வீடு, அலுவலக நேரம், பயணத்துக்காக ஆகும் நேரம் போன்றவற்றையும் கணக்கிட்டு, அதற்கேற்ப காப்பகத்தைத் தேர்ந்தெடுங்கள்.
 காப்பங்களின் சுவர்கள் வண்ண மயமாக இருந்தால், குழந்தைகள் கூடுதல் உற்சாகத்துடன் இருப்பார்கள்.  
ஓடியாடி வரும் குழந்தைகளுக்கு உடம்பில் சின்னச் சின்னச் சிராய்ப்புகள் ஏற்படலாம். இதற்காகக் காப்பக நிர்வாகிகளிடம் சண்டை போடுவது நல்லது அல்ல.
 குழந்தைகளிடம் மனம்விட்டுப் பேசுங்கள். காப்பக ஆயாக்களைப் பற்றி விசாரியுங்கள். மற்ற குழந்தைகளைப் பற்றியும் பேசுங்கள். அந்த மழலைக் குரலில் புகாரும் இருக்கலாம். புகழ்ச்சியும் இருக்கலாம். இதை வைத்துக் குழந்தையின் மனநிலையைப் புரிந்துகொள்ள முடியும்!

குழந்தைகள் காப்பகம் நடத்துவோர் கவனத்துக்கு...
 நல்ல மற்றும் கெட்ட பழக்கவழக்கங்களைக் குழந்தைகள் தங்களைச் சுற்றி நடப்பதைப் பார்த்தே கற்றுக்கொள்கிறார்கள். காப்பக ஆயாக்கள் ஒருவரிடம் மற்றொருவர் உரையாடும்போது, மரியாதைக்குரிய வார்த்தைகளைப் பயன்படுத்துவது நல்லது.
  கண்களுக்கு எது தென்பட்டாலும், உடனே அதை வாயில் வைத்துக்கொள்ளும் பழக்கம் குழந்தைகளுக்கு உண்டு. எனவே, கைக்கு எட்டும் தூரத்தில் எதையும் வைக்காதீர்கள்.

 பற்கள் முளைப்பதால் கடிக்கும் பழக்கம் வரும். மற்ற குழந்தைகளைக் கடிப்பதைத் தவிர்க்க, டீத்தர், நிப்புள் போன்ற பொருட்களை வாங்கிக் கொடுக்கலாம்.
 ஒரு குழந்தை கையை நீட்டிப் பேசும்போது மற்றொரு குழந்தையின் கண்ணில் குத்த நேரிடலாம். பென்சில், பேனா, பிரஷ் போன்ற பொருட்களைக் குழந்தைக்குக் கொடுக்கும்போது, ஒரு குழந்தைக்கும் மற்றொரு குழந்தைக்கும் இடைவெளி விட்டு உட்காரவைப்பது நல்லது.

http://www.puthiyatamil.net



--

இது என் இறைவனின் அருட்கொடையிளிருந்து அருளப்பட்டது www.sahabudeen.com

மழைக்கால நோய்க்கான வீட்டு வைத்தியம்!

பருவ மழையும், குளிரும் பாடாய்ப்படுத்துகிறது. குழந்தைகள், முதியவர்கள், உடல் பலவீனமானவர்கள் மட்டுமல்லாமல், பெரும்பாலானோருக்கு தலைவலியில் தொடங்கி ஜலதோஷம், மூக்கடைப்பு, ஒழுகும் மூக்கு, தும்மல், சளி, சைனஸ், கபம் கட்டுதல் என்று மளிகைக்கடை பில் போல நீளுகிறது பிரச்னைகளின் பட்டியல். இவையெல்லாம் தொற்றாமல் இருப்பதற்கான முன்னெச்சரிக்கை நடவடிக்கைகளை எடுக்கவும்... வந்தபின் நிவாரணம் பெறவும், கீழ்க்கண்ட வீட்டு வைத்தியங்களை கடைபிடிக்கலாமே!

* குழந்தைகள் தொடங்கி அனைவருமே காலை எழுந்ததும் சூடுபொறுக்கும் வெந்நீரில் முகம் கழுவுவது நல்லது. டீ போடுவதற்காக தேயிலைத் தூளைக் கொதிக்க வைக்கும்போது துளசி அல்லது இஞ்சி சேர்த்து கொதிக்க வைத்துக் குடித்தால், சளித்தொல்லைகளில் இருந்து தற்காத்துக் கொள்ளலாம். எலுமிச்சை ஜூஸ் அல்லது எலுமிச்சை டீ குடிக்கலாம். இஞ்சி, நெல்லிக்காய், கறிவேப்பிலை போன்றவற்றை அரைத்து சாறு எடுத்து அதனுடன் எலுமிச்சை சாறு, தேன், தேவைப்பட்டால் சர்க்கரை கலந்து குடித்தால் கூடுதல் பலன் கிடைக்கும்.
* காலை உணவைச் சூடாக உண்பது நலம். சட்னியில் இஞ்சி, கொத்தமல்லி, கறிவேப்பிலை சேர்த்துக்கொள்ளுங்கள். தோசை மாவுடன் முசுமுசுக்கை இலையை அரைத்துச் சேர்த்து சுட்டுச் சாப்பிட்டால், நெஞ்சுச்சளியை விரட்டும். உளுந்த மாவுடன் கல்யாண முருங்கை இலையை பொடிப் பொடியாக நறுக்கிச் சேர்த்து வடை செய்து சாப்பிட்டாலும் சளிப் பிரச்னைக்கு நல்லது.

* மதிய உணவுக்குச் சின்ன வெங்காயம், பூண்டு சேர்த்த குழம்பும், தூதுவளை துவையல், இஞ்சி துவையல், கொள்ளு துவையலும் நல்லது. சின்னவெங்காயத்தை பச்சையாக உரித்து மதிய உணவில் சேர்த்து சாப்பிடலாம். மிளகு ரசமும் நல்லது.

* மூக்கடைப்பு இருந்தால், விரலி மஞ்சளை நல்லெண்ணெயில் தோய்த்து எடுத்து தீயில் வாட்டி, அதன் புகையை சுவாசிக்கலாம். நொச்சி இலைகளைத் தண்ணீரில் போட்டு கொதிக்க வைத்து அதன் ஆவியை சுவாசிப்பதாலும் மூக்கடைப்பு விலகும். நொச்சி இலை கிடைக்காதவர்கள், வேப்பிலையை நீரில் போட்டு கொதிக்க வைத்து மஞ்சள்தூள் சேர்த்து அடுப்பிலிருந்து இறக்கியதும் போர்வையால் போர்த்தி வேது (ஆவி) பிடித்தால்... தலைபாரம், மூக்கடைப்பு, ஜலதோஷம் சரியாகும். ஜாதிக்காயை நீர்விட்டு உரசி எடுத்துக்கொண்டு, கரண்டியில் வைத்து சூடுபடுத்த வேண்டும். குழம்பு போன்று வந்ததும் மூக்கின் மேல் பற்று போட்டாலும் மூக்கடைப்பு விலகும்.

* தலைபாரம், தும்மல், நீர்கோத்தல் போன்ற பிரச்னைகள் இருந்தால், தலையணை உறையில் நொச்சி இலைகளை வைத்து உறங்க, நிம்மதியான தூக்கம் வரும். நொச்சி இலைகளை தண்ணீரில் போட்டு கொதிக்க வைத்து அதன் ஆவியை சுவாசித்து வந்தாலும் இந்தப் பிரச்னைகள் நீங்கும்.

சுக்குவெந்நீர் தயாரியுங்கள் இப்படி!

*மாலையில் சுக்கு காபி குடிக்கலாம். இதை சுக்கு காபி என்று சொல்வதைவிட சுக்கு வெந்நீர் என்பதே சரியாக இருக்கும். சுக்கு வெந்நீர் செய்ய... மிளகு 10 கிராம் என்றால், சுக்கு 20 கிராம், 40 கிராம் தனியா (கொத்தமல்லி விதை), நான்கைந்து ஏலக்காய் சேர்த்துப் பொடியாக்கி, தேவையான அளவு தண்ணீர் சேர்த்து கொதிக்க வைத்து, கருப்பட்டி (பனைவெல்லம்) சேர்த்து வடிகட்டிக் குடிக்கலாம். கிடைக்கும்பட்சத்தில்... துளசி, தூதுவளை, ஓமவல்லி இலைகளைச் சேர்த்துக் கொள்ளலாம். சிற்றுண்டி ஏதாவது சாப்பிட விரும்பினால் ஓமவல்லி இலைகளை பஜ்ஜி மாவில் தோய்த்து பஜ்ஜி செய்து சாப்பிடலாம்.

பூண்டுப்பால் தயாரியுங்கள் இப்படி!

* இரவில் உறங்கப்போவதற்கு முன், பூண்டுப்பால் சாப்பிடலாம். பூண்டுப்பால் செய்ய 50 மில்லி பால், 50 மில்லி தண்ணீர், உரித்த பூண்டுப்பற்கள் 10 போட்டு பாதியாக வற்றும் வரை கொதிக்க வைக்க வேண்டும். அடுப்பிலிருந்து கீழே இறக்குவதற்கு முன் 2 சிட்டிகை மஞ்சள்தூள், 2 சிட்டிகை மிளகுத்தூள் சேர்த்துக்கொள்ளவும். பிறகு, பனங்கற்கண்டு (இல்லாதபட்சத்தில் சர்க்கரை) சேர்த்து கடைந்து சாப்பிடவும்.

மணத்தக்காளி சூப் வைக்கலாம் இப்படி!

* ஜலதோஷம், தொண்டை கரகரப்பு, இருமல் இருந்தால்... மணத்தக்காளி சூப் நல்ல பலன் தரும். எப்படிச் செய்வது? மணத்தக்காளி கீரை, மிளகு, சீரகம், பூண்டு, சின்னவெங்காயம், தக்காளி, உப்பு சேர்த்து நீர் விட்டு கொதிக்க வைத்து, பாதியாக வற்றியதும் இறக்கி வடிகட்டி, பொறுக்கும் சூட்டில் குடிக்கவும்.

இங்கே குறிப்பிடப்பட்டிருக்கும் வீட்டு வைத்தியங்கள் அனைத்துமே பெரிதாக செலவு வைக்காமல், பக்கவிளைவுகளையும் ஏற்படுத்தாமல், ஆரோக்கியத்தை உங்களுக்குப் பரிசளிக்கக் கூடியவை. இவற்றை தேவையைப் பொறுத்து அனைவருமே மேற்கொள்ளலாம்.

http://www.puthiyatamil.net

--

இது என் இறைவனின் அருட்கொடையிளிருந்து அருளப்பட்டது www.sahabudeen.com